Urumea erreka eta erreka bazterrak garbitzeko iaz Goizuetan egindako deialdiak arrakasta handia izan zuen eta 70 bat herritar aritu ziren, suhiltzaileen laguntzarekin txukuntze lan horietan. Aurtengoan, deialdi zabalagoa egin dute eta Goizuetarekin batera, Arano, Ereñozu eta Hernaniko herriek eta Guratrans elkarteak, CRANAk eta Euskal Autonomia Elkarteko Ura erakundeek egin dute deialdia maiatzaren 18rako. Boluntarioek izen emateko zerrendak jarriko dituzte Goizueta eta Aranoko udaletxeetan, autobusak osatzen joateko. Goizuetako Olatso eta Arranbide inguruan, Aranoko Abañon eta Ereñozuko Ugaldetxo eta Fagollaga inguruetan egin nahi dituzte garbitze lanak, beti ere biltzen den jendearen arabera. Hasiera batean, goizean lan egin ondotik Benta Berrin hamaiketakoa hartzeko asmoa dute.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.
Egin TTIPI-TTAPAren lagun