101 urte bete zituen martxoaren 8an Goizuetako Kaperottikin sortua den Carlos Eskudero Mutuberriak. Emaztea ere goizuetarra du, Mantxintxako Petra Bergara Zubiri, baina ezkonduta Oiartzunera joan ziren bizitzera eta orduz geroztik Gipuzkoan bizi dira. Semearekin eta alabarekin, bost bilobekin eta bi birbilobekin ospatu zuten egun handia.
Goizuetarra sortzez, 9-10 urte zituela Berdabiora joan zen Carlos Eskudero familiarekin. Goizuetar batekin, Mantxintxako Petra Bergararekin ezkondu zen, baina Oiartzunera joan ziren bizitzera. Maria Luisa eta Migel Angel alaba eta semea izan zituzten Oiartzunen. Handik, duela 48 urte inguru, Errenterira joan ziren. Bost biloba eta bi birbiloba dituzte Carlos eta Petrak eta elkarrekin ospatu zuten 101. urtebetetze festa. Petrak berak ere 92 urte beteko ditu aurten.
Gazte denboran, basoko lanean aritu zen Carlos, ikatza egiten, eta gero Iberduerorentzat, argindar-lineak jartzen. Oraindik orain, osasunez ongi dago Carlos Eskudero. «Zutik ezin da egon, baina taka-taka hartuta ederki ibiltzen da hara eta hona, bera garbitzen da eta gauza batzuetarako laguntza behar baldin badu ere, ederki moldatzen da eta burua oso ongi du», dio Maria Luisa alabak. Bizitzako oroitzapenik onena zein duen galdetzerakoan, «espostea» erantzun digu zalantzarik gabe Kaperottikikoak. Gerra ezagutu bazuen ere, oroitzapenik txarrena «soldaduska Afrikan egitea» dela dio.
Aspaldian Gipuzkoan bizi arren, sorterria ez dute ahazteko Carlos eta Petrak eta urteetan Goizuetan duten pisura etorri dira Aste Santua eta uda pasatzera, bilobekin. «Orain zaila da, aszensorerik ez du pisuak eta eskaileraz ezin ditut igo, beraz ez gara joaten», dio.