Azken urteetan bezalaxe, ostiralean hasi eta igandera arte luzatuko dira Aresoko inauteriak. Ostiralean, 18:00etan eskea egingo da herrian barna Plaza Zaharretik hasita. 21:00etan Pake Tokin Lagun artekoen afaria egingo da. Egun handia ordea, larunbata izango da. Iaz ijito koadrila galantak hartu zuen herria eta aurtengoan apaiz eta monja koadrila omen da biltzekoa. Errosario, bibilia eta gurutzeak hartuta baserriz baserri ibiliko dira eskean Ingo Al Deuko trikitilarien laguntzarekin. 17:30 inguruan mozorro desfilea egingo da herrian barna eta ondoren musika egongo da plazan.
Herritarren antzerkia
Aurtengo inauterien berrikuntza nagusia herritarren antzerkia izango da. Ekimen hau aurrera eramaten den lehenengo aldia da. Herritar talde bat entseguak egiten ibili da azken hilabeteetan eta egindako lanaren fruituak 19:00etatik aurrera ikusgai izango dira udaletxean. 21:30ean Pake Tokin herri afaria egingo dute eta ondoren musika egongo da Ingo Al Deu trikitilarien eskutik. Igandean, Larrea Elkartean egingo duten bertso bazkariarekin amaituko dira inauteriak.