Abenduaren 28ko udal batzarrean, 2013 aurrekontuak onartu zituzten. Guztira 2,41 milioikoa izanen da, joan den urtekoa baina txikiagoa. Honen arrazoia inbertsio nagusiak aurrikusten diren Nafarroako Azpiegitura Plana amaitu izana da.
Aurrekontuetan ez da aurreikusten inbertsio haundirik egitea, errealitatean, ordea, Amazabal auzoko eta ETAPeko lanak 2013an eginen dira, nahiz eta 2012ko kontuetan aurreikusiak izan. Hauetaz gain, mendiko lanak (30.000 euro), UE50eko urbanizazio lanak (52.000 euro) haur eskolako eta Erleta eskolako hobekuntza lanak (90.000 euro) eta beste hainbat lan txiki egingo dira: baserrietako seinalizazioa, guardetxean moldaketak, eszenatokia, Iberon indusketa lanak ...
Arlo sektorial desberdinetako gastuei eskainiko zaie lehentasuna: gizarte zerbitzuetan, hezkuntzan, euskara eta kulturan, herriko eragileentzako laguntzetan… Horrenbestez, hezkuntzan 487.184 euro gastatzea aurreikusten da, euskara eta kultura arloan 313.200 euro, ongizate eta kirolean 312.179 euro, Plazaola Partzuergoan eta Cedernan 56.930 euro, mantenimendu lanetan 169.068 euro…
Azkenik, aurrekontuetan tasa eta zerga gehienak igoerarik gabe mantentzea aurrikusten da.