Malerreka eta Bortzirietako gazteak bezala, Leitzako gazteak ere prozesu eratzailean buru belarri dabiltza lanean. Orain arteko asanbladetan eman diren eztabaidekin «oso gustura» daudela esan digute, «gazteon artean sortu den giro eta harreman onarekin, gai ezberdinen inguruan lortu dugun formakuntzarekin…» eta «orokorrean, prozesua bera oso positiboa» izaten ari omen da guztiontzat.
Gazte estrategia definitzea gelditzen zaie orain eta Leitzako gazteen ustez «garrantzi handia duen blokea da, gazteoi zuzenean eragiten diguna izateaz gain, zeresan handia duen atala baita».
Oraindik parte hartu ez dutenei deia zabaldu diete: «Norbanakotik hasita kolektibora, denon artean lortuko dugulako!», denon ekarpenak baitira maila berean garrantzitsuak, eta argi ikusi dugu umorerik ez zaiela falta, honela esan baitigute : «Euskal Herriko hainbat gurasok lortu ez dutena, prozesu eratzailearen bidez lortuko dugu; gazteok fruta jatea atsedenaldietan txokolate bero eta zukuarekin batera!».