Leitzako udalak frankismoko ikurrak kentzeko prozedurak jarri ditu abian. Herrian eta baita Nafarroa osoan ere, frankismoko ikurrak ugariak dira oraindik, eta horrek «frankismo kriminalak eta bere arduradunek eduki duten zigorgabetasun osoa gogora ekartzen» dutela ikusita hartu dute erabakia.
Nafarroako Gobernuko Landa Garapen, Ingurumen eta Toki Administrazioaren Departamentuari, Gobernuaren Ordezkaritzari eta Artzapezpikutzari luzatuko diete Nafarroako herri eta administrazio guztietatan eta Nafarroako Foru Aldundiaren eraikinean dauden ikurrak kentzeko eskaria.
Udaleko zerbitzu juridikoari ere beharrezko urratsak emateko eskatu diote. Herritarrei ere laguntza eskatu diete, Leitzan dauden frankismoaren ikurren kokapenaren berri emanez lagundu dezaten.