Leitzako Kirol Elkarteak zuzendaritza taldea berritzeko asmoa du. Horixe izanen da azaroaren 23an, ostiralean, eginen duten ohiko bilkuran gai nagusia. Arratsaldeko 20:00etan batzarraren lehen deialdia izanen da eta 20:15ean bigarrena. Zuzendaritza talde berrian parte hartzeko interesa dutenek azaroaren 17ra arteko epea izan dute. Aurkeztutako jendearen artean aukeraketa eginen dute orain bazkideek eta lehendakaria, lehendakari ordea, idazkaria, diruzaina eta bokalaren postuak beteko dituztenak izendatuko dituzte. Heldu den urteari begira kirol koordinatzaile baten beharra ere somatu dute Aurrerako arduradunek. Beraz, proposamena bidali dutenen artean kirol koordinatzailea ere hautatuko dute ostiraleko bileran.
2011ko irailetik 2012ko irailera bitarteko kontuen onarpena ere eginen dute bazkideek. Elkartetik jakinarazi dutenez, urte hau 4.000 euro inguruko superabitarekin itxi dute, 69.029,50 euroko gastuak izan dituzte eta 73.004,46 euroko diru sarrerak.