Mendialdea Mankomunitateak, herrian puntu garbia jarriko du martxan. Hortarako azaroan, etxetxo bat ezarriko dute Arekozubiko ondoan. Bertara arriskua eragin dezaketen edukiontziak edo bereziak diren hondakinak bota ahalko dira. Besteak beste spraiak- aerosolak, X batekin azaltzen diren garbiketa produktu toxikoak gordetzen dituzten ontziak, tonerrak eta inprimitzeko kartutxoak, pinturak eta berniz poteak, motorretako olio latak, fluoreszenteak, kontsumo txikiko bonbillak. Ontziak itxita bota beharko dira etxetxoak izanen dituen zulo ezberdinetan. Ontzi hauetaz gain, cd-ak eta kasetteak, etxetresna txikiak, baratzetako produktuen botilak, pilak eta bateriak, eta baita merkurioa duten termometroak botatzen ahal dira. Horrelako hondakinak bereiziz, ingurugiroa zaintzeaz gain, bizi kalitatea haundituz joatea dute helburu, birziklatzearen inguruan aurrerapauso haundia eginez herrian eta eskualdean. Leitzaz aparte Goizuetan eta Lekunberrin ere jarriko dituzte horrelako puntu garbiak. Gainerako herri txikietan furgoneta berezi bat ibiliko da egun jakinetan horrelako hondakinak biltzen.