Dantzari eta txistulariak itzuli dira Txekiar Errepublikako Valasske Mezirici herrian ospatutako Babi-Leto folklore jaialditik. Bidaia luzea izan arren, merezi izan duela eta oso balorazio ona egin dute, esperientzia aparta izan baita taldekide guztientzat. Ekitaldiz beteriko egunak izan ziren, euskal folklorea zabaltzeko parada ugariz beteak. Oso harrera ona jaso zuten, bai antolatzaileen partetik eta baita gainontzeko talde eta ikusleengatik ere. Jaialdian Polonia, Eslovakia, Eslovenia eta Txekiako taldeek hartu zuten parte.
Dantza saioei dagokionez, ahalik eta dantza desberdin gehien eskaintzen saiatu ziren. Umeei zuzenduriko dantza saioa ere izan zuten, eta umeek beraiekin batera dantzatzeko aukera izan zuten. Helduei zuzenduriko dantza ikastaroa ere eman zuten.
Normalean, dantzan eta txistua joz ikusten baditugu ere, jaialdi honetan sukalderako eta kantatzeko abilidadea ere badutela erakutsi zuten. Jaialdiko ekitaldien artean talde bakoitzak beraien herrialdetako jakiak eskaintzeko aukera izan zuen, eta leitzarrek taloak prestatu zituzten, txakolinarekin batera dastatzeko. Kantuan ere aritu behar izan zuten eta txistulariek ere beraien kontzertua eskaini zuten.
Jaialdiko ekitaldi ofizialez gain, aisialdirako denbora pixka bat ere izan zuten: ingurua ezagutu, erlaxatu, eta nola ez, txekiar garagardoa probatzeko aukera.