Euskalduntzen edo alfabetatzen ari diren herritarrei diru laguntzak emanen dizkie Nafarroako Iparraldeko Euskara Mankomunitateak. 2011ko irailaren 1etik 2012ko abuztuaren 31ra arte egindako ikastaroen matrikuletarako emanen du laguntza, estentsiboak, trinkoak, barnetegiak, informatika bidezkoak izan eta oro har Balorazio Batzordeak onesten dituenak.
Laguntzaren zenbatekoa gastuaren %50ekoa izanen da gehienez ere, eta ikasturtean langabezian egondakoentzat %100ekoa izanen da laguntza. Halere, diru laguntzaren onuradunek ezin izanen dute 640 euro baino gehiagoko laguntzarik jaso deialdi bakoitzeko eta kilometrajea ez da diruz lagunduko.
Eskabideak urriaren 5era bitarte aurkezten ahalko dira, Iparraldeko Mankomunitateko erregistroan edo dagokien herriko udaletxe edo euskara zerbitzuan. Eskaera aurkezteko Nafarroako Iparraldeko Euskara Mankomunitatea osatzen duten herrietan erroldatua egotea ezinbestekoa izanen da.
Ttipi-Ttapak hartzen duen eremuari dagokionez, Arano, Areso, Goizueta eta Leitzako euskara ikasleek izanen dute dirulaguntza horretarako eskubidea.