Irailaren 10ean Aurrera Dantza Taldeko kideak Txekiarantz joan ziren, Babi leto 2012 folklore jaialdian parte hartzeko gonbidapena jasota. Valasske Meririzi herrian izanen da jaialdia eta munduko beste dantza taldeekin ariko dira Aurrerakoak, Euskal Herriko dantzak erakusten.
Hamabost minutuko dantzaldiak egin eta jendeari hemengo dantzak erakusteko tailerrak eginen dituzte. Honekin batera hemengo produktu batzuk –txakolina, patxarana eta taloak– eraman dituzte jaialdian dastaketak egiteko beste taldeekin batera, seguru aski kultur trukaketarekin giro ederra sortuz. Aurtengoa bigarren aldia izanen da Txekiako jaialdira gonbidatu dituztela leitzar dantzariak. Aurrekoan 2006an izan ziren. Guztira 26 lagun joan zaizkigu herritik, ikusi beharko dugu ze berri ekartzen duten eta nolako harrera izan duten.