Euskal Herriko beste hainbat tokitan bezala, Leitzan ere Kontseiluak bultzatu duen euskaraz bizi nahi dut herri lasterketa eginen da larunbat honetan, irailak 22. Euskaraz bizitzeko nahia harrotasunez eta elkar hartuta adierazteko beste aukera bat izanen da.
Adinaren arabera, hiru ibilbide prestatu dira: 2003-2012 urteetan jaiotakoek 800 metro egin beharko dituzte, 1997-2002 urteetan jaiotakoek 2.250 metro eta 1996an baino lehenagokoek 5.000 metro. 2003-2012 urteetan jaiotakoek 16:30ean abiatuko dira eta bertzeak 17:00etan.
Izena aurretik Maimur edo Astiz liburu-dendetan eman daiteke, eta bestela, egunean bertan plazan. Izena ematerakoan, 1997-2002 urte bitartean jaiotakoek bi euro ordaindu beharko dituzte eta gainerakoek bost. Dena den, euskaraz bizi nahi dut leloa daraman kamiseta bat eskuratzeko aukera ere izanen da bost euro gehiago ordainduz gero.