Amazabal Institutuko Guraso Elkartea kide berriez osatu zenetik ikasturte bat pasatu denean, egindako lanaren berri eman dute elkarteko gurasoek. Guraso Elkartea 1998an sortu zen, eta gurasoen partaidetzarekin «gorabeherak» izan badira ere, elkarteko kide berriek bertatik pasatu eta lan egin duten guztiei eskerrak eman nahi izan dizkiete. Kide berriak sartu aurretik, elkartean lagun bakarra aritu zela ere gogoratu dute: «nahiz eta ahal zuen guztia egin, ezinezkoa zen egoera horretan elkarteak aurrera egitea. Ondorioz, Pello zuzendariaren laguntzarekin zortzi guraso animatu ginen taldea osatzera». Guraso Elkarte berritua 2011-2012 ikasturtean hasi ziren lanean eta lan administratiboak egiteaz gain, zenbait hitzaldi eta ikastaro antolatu zituzten joan den ikasturtean.
Azken ikasturteko ikasleen emaitzak ere kaleratu dituzte. Lehenengo DBHn 19 ikasletik 16k gainditu dute, 2. DBHn 18 ikasletik 17k, 3. DBHn 60tik 51k eta 4. DBHn 29tik 27k. Batxilergoan, berriz, 2. mailako 19 ikasletik 17k dena gainditu dute eta kurtso berrian bi ikasgai ‘libretik’ egiteko bi ikasle gelditu dira.
Institutuko ikasgaietatik aparte, ikasleek egin dituzten bestelako frogen emaitzak ere jakinarazi ditu Guraso Elkarteak: selektibitatea %94k gainditu dute, euskarako B2 froga %85ek eta EGAko azterketa %50ek. Kasu honetan, Nafarroa mailan %16k gainditu dutela kontuan hartuz, Leitzako ikasleen emaitzak «oso onak» direla iritzi dio Guraso Elkarteak. Ingeleseko B1 froga, berriz, hirutik hiruk gainditu dute.
Emaitzak «orokorrean oso onak direla» ikusita, «gure gazte gehienak ikasketetan oso inplikatuta» daudela dio Guraso Elkarteak, eta ikasle, guraso eta irakasleei zorionak eman nahi izan dizkie. Bide batez, beraien lan-taldean parte hartzeko gonbitea ere luzatu du, «batez ere, Larraun, Lekunberri, Betelu, Araitz, Areso eta Goizuetatik Leitzako ikastetxera seme-alabak bidaltzen dituzuen gurasoei»
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!