Nekazaritza Ganbarak Leitzan duen bulegoko langilea jubilatu egin zen joan zen apirilean. Geroztik ematen den zerbitzua ez da behar den moduan betetzen, astean behin, asteazkenetan, etortzen baita langile bat ordu batzuk egitera. Baldintza hauetan ezin zaie behar den zerbitzua eman gure herriko eta inguruetako abeltzain eta nekazariei.
Gurea bezalako herri batean, abeltzainek eta nekazariek garrantzi handia dute bai ekonomikoki eta bai gure ingurumena orekatua mantentzeko ere. Hau dela eta, Udalak mozio bat aurrera atera zuen Bildu eta UPNren aldeko botoekin eta DNEren aurkako botoarekin. Horren arabera, lehen sektorea egoera larrian dago aspalditik eta Nekazaritza Ganbaran langile bat modu iraunkorrean eta zerbitzu osoa ematen aritzea beharrezkoa dela eta, Nafarroako Gobernuari Nekazaritza Ganbararen zerbitzua bere osotasunean mantentzeko eskatu zaio eta Leitzako bulegoan langile bat lanaldi osoan aritzea.