Duela bi hilabete inguru, bigarren mailako eskuz binakakoa Ceciliorekin irabazi ondotik, buruz burukoan ere nagusitzea lortu du Jon Jaunarena leitzarrak, denboraldi bikaina borobilduz. Ekainaren 30ean Iruñeko Labrit pilotalekuan jokatutako final lehiatuan 22-16 irabazi zion Joseba Ezkurdiari. Jaunarenak Abel Barriola herritarra izan zuen botilero.
Partidaren lehenbiziko zatia oso parekatua izan zen, nahiz eta leitzarra 7-2 irabazten jarri. 7-6kora hurbildu zen Arbizukoa, baina berriz ere 10-6 aurreratu zen Jaunarena. Baina 0-5eko partzialarekin markagailuan aurretik jarri zen Ezkurdia. Hamaikana, hamabina, hamahiruna eta hamalauna berdindu ondotik, nekea somatzen hasi zen Jaunarena eta bazirudien Arbizurako bidea hartuko zuela txapelak. Baina ongi errekuperatu zuen leitzarrak eta irabazten jarri zen. Azkenean, txapela Leitzara ekarri zuen.