UEMA Eguna zela eta hasi ziren bazterrak mugitzen, Frankismo garaian euskara bultzatzeko laguntzak bazirela eta herrian antzerki talde bat bazela jakin zenean. Eta orain bai, Frankismo garaiko euskarazko antzerkiak berreskuratu direla ere esan daiteke eta orduko aktore gehienak oraindik garai hartako istorioak kontatzeko moduan dira. Izaskun Bakero zinegotziak eman dizkigu xehetasunak.
Milagros Barrenetxekoa, Marikarmen Bibianona, Arantxa Berroeta, Antton Berroeta, Axun Maiokoa, Maritxu Txokokoa, Marianjeles Artzangoa, Pablo Miranda, Xebeino Berroeta... Horiek izan ziren aktore lanetan aritu zirenetakoak, eta atzean, antzeztokiaz eta makillajeaz arduratzen beste talde bat ere aritzen zen.
Eta orain, urte batzuk pasatu direnenan, saioetako argazkiak eta gidoiak berreskuratu dira, azken hauen bertsio originalak Barrenetxeko Milagrosek gorderik izan dituelako.
Bi antzerkiren datuak lortu dira. 1959an Antonio Amundarinek idatzitako Usteiñat, ya lo creo da horietako bat. Etxeetara zerbitzatzera joaten ziren emakumeen istorioak kontatzen ditu eta emakumezkok ziren aktore guztiak. Aberatsak olaxe egiten 1962ko abuztuaren 19ko Euskararen Egunean estreinatu zuten, On Saturnino orduko apezak egina. Gainera, Vianako Printzea erakundeak dirulaguntza eman zion antzerki honi, eta horri esker, Goizuetan ez ezik, kanpoan barna ere ibili ziren antzezlana eskainiz: Iturenen, Donezteben, Iruñeko Gaiarre antzokian, Betelun... Maintemindu den mutil gazte baten istorioak kontatzen ditu.
Orain, datu gehiago bildu nahi dituztela adierazi digu Bakerok, Azaro Kulturalean zerbait egiteko. Baina «ametsa antzerki horietako bat martxan paratzea izanen litzateke», gaineratu digu.