Uda iritsi zaigu eta honekin batera umeak eskola garaia bukatu dute. Urteroko legez, San Juan bezpera izan dugu horren adierazgarri eta ederki ospatuak geratu dira. Ekainaren 23a egun berezia da Euskal Herri osoan eta Areson ere izan zuen bere partea. Arratsaldean umeen jokoak, tailerrak eta merienda egitekoak ziren plazan, eta gauez herri afaria denentzat. Urtero Guraso Elkarteak antolatzen duen festan aurtengoan Udalak ere bat egin du eta horrela, haurren edaria Guraso Elkarteak eta helduena Udalak ezarri du. Afaria norberak berea eramaten du etxetik prestatua, eta guztiek beren partea eginda helburu nagusia giro ederrean gau polit bat pasatzea izaten da, baita lortu ere. Iluntzean, sua egitekoa zen.
San Juan bezpera ondoren, San Pedro jaiak izango dira asteburu honetan herrian. Ostiral arratsaldean hasiko dira San Pedro eguneko meza eginez eta herriko eskearekin. Gauean, Lagun Artekoek afaria egingo dute Pake Toki elkartean.
Larunbata izango da egun handia, goizean goizetik ederki gosaldu ondoren, baserrietako eskean ariko baitira gazteak. Egun guztia han pasa ondoren, plazan musika jarriko dute herritar guztientzat eta eguna amaitzeko herri afaria izango da Pake Toki elkartean. Afalondoren ere musika izango da. Esan, afarirako txartelak Sastinean daudela salgai.