Ez du Italiako Giroko etaparik irabaztea lortu joan den urtean bezala; bai, ordea, sailkapeneko lehenengo hamarren artean sailkatzea. Lan ederra egin du Euskaltel-Euskadiko Mikel Nievek (Leitza, 1984) aurtengo Italiako Giroan eta sailkapenean hamargarren bukatu du, Hesjedal (Kanada, 1980) Giroko txapeldunarengandik zortzi minutu eta zortzi segundora.
Egindako lanarekin kontent itzuli da etxera Nieve. «Lehenego hamarren artean sartzea oso konplikatua da, eta pozik egotekoa da. Gainera, arriskatuz lortu dugu, urrutitik eraso eginez eta talde elkartua eta ausarta garela erakutsi dugu», esan zuen Leitzako txirrindulariak maiatzaren 27an Giroa bukatutakoan.
Alvaro Gonzalez de Galdeano Euskaltel-Euskadiko kirol zuzendaria ere kontent zegoen Nieveren lanarekin: «hiru asteko lasterketetan gizonik indartsuenetakoen artean sartzen da. Giro honetan bere kirol eboluzioa haunditzen ari dela ikusi dugu. Bere ezaugarrietara egokitzen den lasterketa da Italiako Giroa eta balore segurua da».
Aipatzekoa da, joan den urtean sailkapen nagusian hamaikagarren gelditu zela Nieve, txapeldunarengandik 16 minutu eta 18 segundora. Eta joan den urtean, Giroko etaparik menditsuena ere irabazi zuen.