Aspaldiko urteetan galdua zen ohitura berreskuratu egin nahi du Umore Ona Elkarteak, eta herriko beste eragileen laguntzarekin, krosa antolatu du maiatzaren 27rako.
Denek izanen dute parte hartzeko aukera, txiki eta helduek. 10:30ean hasiko dira txikienak eta 11:00etan emanen zaio irteera helduen laisterketari. Helduen ibilbidea egiteko, garai bateko zirkuitua berreskuratuko da. Herria inguratuko du, plazatik atera eta bertan bukatuko da, erdia errepidetik eginen da eta beste erdia mendiko senda batzuetatik. Hiru kilometroko luzera du zirkuituak eta hiru itzuli egin beharko dira, bederatzi kilometro osatuz.
Laisterketaren inguruko informazio gehiago eta izena emateko www.kirolprobak.com webgunean egin daiteke. Izen-ematea orokorrean hamar euro gostako da, baina herritarrentzat zortzi euro eta egunean berean hamabortz euro.
Kanpotik datozen partaideentzat, antolakuntzak dutxak eta motxilak uzteko gunea prestatuko ditu. Gisa berean, parte hartzen dutenentzat opariak izanen dira eta zozketak ere eginen dira.