Estimatzeko lana da suhiltzaile boluntarioek egiten dutena eta beraien beharra badela ere agerikoa da, ateraldi saila egitea tokatzen baitzaie. Garai honetan, suteetan egin behar izaten dituzte esku hartze asko, baina aurtengo denboraldia «nahiko txukun» omen doa. Halaxe esan diote TTIPI-TTAPAri. Ihes egindako bi sute baino ez dira izan orain arte.
Anbulantziari ere tokatzen zaizkio ateraldi franko egitea, baina suhiltzaile boluntarioek behar ez duten titulua behar da horretarako, ATA delakoa, edo anbulantzia gidatzeko baimena. Hori lortzeko helburuarekin hasi ziren joan den irailean hamar lagun ikastaroa egiten, bi leitzar eta zortzi goizuetar. Geroztik, abenduan izan ezik, larunbatero horretan ibili dira eta duela gutxi bukatu dituzte alde teorikoa eta praktikoa. Orain, berriz, guardiak egin beharko dituzte Iruñean.
Titulu hau duen jende berria ongi etorriko da, orain arte gutxi batzuk baino ez baitziren anbulantzia gidatzen ahal zutenak. Aipatu, iaz 30 irteera egin zituela herriko anbulantziak Goizuetan, Aranon eta zenbaitetan Leitzan ere bai.