Lehen ere aipatu dugun bezala, Bardoak 2012 Nafarroako Taldekako Bertso Txapelketako finala herriko pilotalekuan eginen da martxoaren 31n. Sailkatutako hiru talde ariko dira nor baino nor, guztira bederatzi bertsolari.
Saioa 17:00etan hasi eta 20:00etarako amaituko da. Horren ondotik, triki poteoa eginen da herrian barna, eta eguna borobiltzeko, 21:30ean, herri afaria eginen da eskoletan. Bertsozale Elkartetik aurreratu dutenez, afaloste animatua izanen da, eszenatoki ttiki bat ere izanen baita.
Finalerako bi sarrera mota jarri dira salgai, batetik, soilik bertso-saiorako dena (15 euro) eta bestetik, saioa eta ondoren eginen den herri afarirako (30 euro). Sarrerak www.bertsosarrerak.eu webgunean eta Nafarroako hainbat tokitan eros daitezke: Maimur liburu-dendan, Lesakako okindegian, Elizondoko Fantxike arropa eta opari dendan, Etxarriko Xapatero ostatuan eta Iruñeko Karrikiri dendan.