Aurreko legealdian hainbat saiakera egin ondotik, UEMAko zuzendaritzak aurtengo UEMA eguna Goizuetan ospatzea erabaki du eta ekainaren 9an izanen da. Festa eta aldarrikapenerako egun hau gogoan, herritarrak prestatzen hasiak dira. Otsailaren 11n eta martxoaren 7an egindako deialdietara hamabost lagun bildu ziren, eta Alaitz Eskudero zinegotziak azaldu digunez, «oraindik egitaraua guztiz osatu gabea bada ere, egun guztian izanen dira ekintzak». Gaineratu digunez, «eguna UEMAko hautetsien batzarrarekin hasiko da, ondotik bisita gidatua eginen da herriko etxeetan, haurrentzako puzgarriak, dantzariak, ekitaldia, herri bazkaria, dantzaldia eta oraindik zehaztu gabeko ekintzak izanen dira». UEMA egunari dagokion lema oraindik adostu gabea da, baina «proposamen polit ugari» bildu omen dira bileretan. Hurrengo bilera apirilaren 3an izanen da, udaletxeko batzar aretoan, 19:00etan.