12 eta 16 urte bitarteko gazteak elkartzen dituen Gazte Txokoko komisioan izen berriak sartu dira. Orain arte, 12-16 urtekoen gurasoen izenean, Ana Lujanbio eta Mila Loiarte, Guraso Elkarteko Igor Elizegi, 12-14 urteko Lucia Etxeberria eta Garazi Loiarte eta Gaztetxeko Zuriñe Lujanbio izan dira komisioan egon direnak. Urtarrilaren 28ko bileran, ordea, lagun gehiago sartu ziren: Patxi Iribarren eta Jose Ramon Etxegia gurasoak ere komisioko kide izanen dira, eta Garazik utzi egin duenez, beste hiru gazte sartuko dira taldean. Lehendik komisioan zeudenak ikasturte bukaeran aterako dira.
Orain arte, ping-pong edo futbolin txapelketak antolatu izan dituzte, baina hilabete honetan egutegia antolatzeko bilduko da komisioa. Dirua lortuz gero, ateraldiren bat egin nahiko lukete.
Asteburuetan zabaltzen ditu Gazte Txokoak ateak, larunbatetan 16:30etik 20:30era eta igandetan 16:00etatik 20:00etara.