1998ko apirilaren 12an debutatu zuen Aimar Olaizolak (Goizueta, 1979) pilotari profesionalen munduan, 18 urte baino ez zituela. Geroztik bederatzi txapel eskuratu ditu txapelketa ofizialetan, eta beste bost alditan finalera ailegatu eta azpitxapeldun izan da. Joan den abenduan lau t’erdiko bere bosgarren txapelketa irabazi zuen eta horrela, historian modalitate horretan txapel gehien lortu dituen pilotaria bilakatu da goizuetarra. Orain, berriz, binakakoan ari da Beroiz atzelari duela.
Pilotari profesional gisa, 2011 urte borobila izan da Aimar Olaizolarentzat, «beharbada, eduki dudan hoberena». Halaxe adierazi digu Goizuetako pilotariak. Eta ez da gutxiagorako. Hiru txapelketa ofizial jokatu zituen 2011n, hiruretan finalean izan zen eta bi txapel irabazi zituen: binakakoa eta lau t’erdikoa. Eta hori guztia 2010ean belauneko lesio larri bat izan zuela kontuan hartuz.
Palmaresa ere ederki hornitzen ari da. 1998an debutatu zuen 18 urteko gazteak bederatzi txapel irabazi ditu dagoeneko: banaka bi (2005 eta 2007), binaka beste bi (2008 eta 2011) eta lau t’erdian bost (2002, 2004, 2005, 2008 eta 2011). Lau t’erdian, gainera, historia egin du, orain arte Retegi II.arekin berdindua zuen marka –launa txapel– hobetuz: «Gauza horiei ez diot garrantzia gehiegirik ematen, baina polita da. Historian izan den pilotaririk haundienarekin berdindua nengoen lau t’erdiko tituluetan eta orain, berak baino txapel bat gehiago irabazteak ilusioa egiten du», esan digu.
Abenduaren 11n jantzi zuen bosgarrena, Irujori irabazita. Txapel «berezia» izan zela aitortu digu, finalaren aurreko egunak ez baitziren xamurrak izan: «behatzeko lesioa zela, baina batez ere, hiru egunetan osaba eta atta galdu... Horrelako partidetan oso zentratua egon behar da eta beldur hori nuen». Baina hasieratik bukaerara partidan sartuta ikusi zuen bere burua. 22. tantora ailegatzean, «zerbait diferentea sentitzen» omen du, baina azken finala are «diferenteagoa» izan zen. Txapela attari eskaini zion: «berari dedikatu nahi nion eta agian horregatik indar gehiagorekin atera nintzen».
Lau t’erdikoa pasatuta, eta atseden hartzeko denborarik gabe –2011n ez zuen aste batez ere deskantsatu–, binakakoan dabil orain burubelarri. Beroiz atzelari duela, «oso gustura» dagoela aipatu digu, baina bere ustez, «irabaztea oso zaila izanen da». Irujo-Barriola bikotea ikusten du faboritoen artean, nahiz eta ez duen erraz uzteko asmorik: «lana gogor jartzen saiatuko gara».
Gaur egungo pilotari hoberenetarikoa da, baina pilotari bezala, bere zein ezaugarri nabarmenduko lukeen galdetuta, «hori besteak esatea hoberena!», erantzun digu irribarrez. «Ez dut uste gauza batean nabarmentzen naizenik. Nahiko konpletoa naizela esanen nuke, gauza batean nabarmendu gabe». Alde batera edo bestera, egunero entrenatzen duela ere kontatu digu: «batzuetan pilotan, besteetan fisikoa... Ez da ordu asko izaten, baina egunero zerbait». Hortik aparte, elikadura «pixka bat» zaintzea gustatzen omen zaio.
Pilotan ongi konpontzen dela gauza jakina da. Baina, zer moduz moldatzen ote da attaren paperean? «Niretzako gauza berria da, eta oso polita. Momentuz inongo arazorik gabe, baina beno, hori andreari galdetu beharko!», dio. Egunen batean semeak pilotari izan nahi duela esanen balio, «gustura» hartuko lukeela dio, baina «garbi dut berak ez badu frontoira joan nahi eta ez badu afiziorik, ez dudala behartuko. Gustatzen bazaio, lagunduko diot, baina ez dut arazorik, ez bazaio gustatzen edo beste edozein kirol nahiago badu». Hori, ordea, denborak erakutsiko du. Bitartean, Aimar bera da pilotan segitu nahi duena: «Ni ere urtetan aurrera noa eta kontratua 2018 bukaera arte dudanez, helburua hori betetzea da. Eta oraingo maila ematen badut, hobe». Asier bere anaiak esana da, Aimar «pilotari jaioa» dela, alegia, berezkoa duela, eta horregatik edo ez dakigu zergatik, baina bide honetatik segituz gero, txapel gehiago ere jantziko ditu.
LAU T’ERDIKO FINALA
«Horrelako partidetan oso zentratua egon behar da eta lau t’erdiko finalean beldur hori banuen aurreko egunetan pasatutakoagatik (...) Txapela attari dedikatu nahi nion eta agian horregatik indar gehiagorekin atera nintzen»
SEMEA PILOTARI?
«Semeak pilotaria izan nahi badu lagunduko diot, baina ez dut arazorik ez bazaio gustatzen edo beste kirolen bat nahiago badu»