Aurten ere, eskolako ikasleak izanen dira Olentzero eta Mari Domingiren bisita jasoko duten lehenengoak. Urteko azken eskola egunean izanen da, abenduaren 22an. Egun horretan, 09:30 aldera, jaialdia eskainiko dute eskolako haurrek gurasoen aurrean, antzerki, abesti eta abarrekin. Ondotik, musika doinuen laguntzarekin, herrian kalejira eginen dute Olentzerorekin, eta herriko itzuliaren egindakoan, Mari Domingi etorriko da Olentzerorentzako gutunak biltzera. Guraso Elkarteak, bere aldetik, hamaiketakoa eskainiko du.
Abenduaren 24ko arratsaldean etorriko da Olentzero opariekin. Menditik jaitsiko da bere astoarekin eta gurdia opariz beteta duela. Laguntzaileak ere ondoan izanen ditu, eta herrira iritsi baino lehen, trikitilari, haur, gazte eta helduak zain izanen ditu. Denak batera herriko plazara jeitsi eta abesti bat kantatuko diote haurrek. Bide batez, plaza apaintzen duten irudi eta jaiotza ere erakutsiko dizkiote ikazkinari. Ondotik, plaza zaharreko estalpera joanen dira denak eta hemen, haur bakoitzari bere oparia eta goxokiak banatuko dizkio Olentzerok. Opariak emanak dituenean, abesti batekin datorren urtera arte agurtuko dute herritarrek Olentzero. Aipatu, halaber, haurrei opariak banatu bitartean, trikitixa doinuak ere izanen direla eta Udalak berendua ere emanen duela.