«Utzi pakean Leitza!». Halaxe adierazi du «ozen eta indartsu» Auzipetuekiko babes taldeak. Izan ere, azken urtebetean hamabi herritar deitu dira deklaratzera, eta babes taldearen irudiko, «3.000 pertsonako herri txiki bat izanda datua benetan larria eta esanguratsua da».
«Leitzan eta Euskal Herrian garai berriak bizi ditugula» dio babes taldeak, «Euskal Herriak bizi duen gatazka konpontze bidean, urrats esanguratsuak eman direla» gaineratuz. Baina, bestalde, «herritarren aurkako erasoek ez dutela etenik» salatu dute: «betidanikoa izan arren, azken bi urteotan areagotu egin dute gure herriaren aurkako erasoaldia, eta presoenganako elkartasuna eta gazteria kriminalizatzea izan dute helburu».
Bi urteotako «erasoaldiaren laburpena» ere egin du babes taldeak:
• 2009ko urria: «Maxurreneko atarian ‘antzerkia’ eta ondorengo intoxikazio mediatikoa».
• 2010eko urtarrila: «errege bezperako euskal preso politiko eta iheslarien aldeko elkartasun afaria debekatzea».
• 2010eko ihoteak: «atsauretutako gaztetxe eta antolatutako ekimenak legez kanporatuak».
• 2010eko abuztua: «herritar bat Audientzia Nazionalera deitua ‘terrorismoari gorazarre’ egitea leporatuta».
• 2011ko martxoa: «hiru gazte identifikatuak Jone Lozanoren atxiloketa salatzeko kartelak jartzen ari zirela».
• 2011ko apirila: «beste hiru gazte identifikatuak Joneren argazkiak jartzeagatik. Sei hauetatik hiru adingabeek Audientzia Nazionalera deklaratzera joan behar izan zuten, ‘terrorismoaren gorazarre’ egitea egotzita».
• 2011ko pestak: «herriaren aurka eraso mediatikoa eta ondorioak: pestetan eta ondoren, nabarmen igo da presio poliziala, uniformez zein kaleko arropaz, kalean barrena argazkiak ateraz, kontrolak gehituz, pankartak kenduz, jendea identifikatuz ibili baitira».
• 2011ko iraila: ‘terrorismoa goratzea’ egotzi die Espainiako Auzitegi Nazionalak Oier Eizmendi alkateari, Saioa Iraola pestetako txupinazoa bota zuenari eta Lurdes Juantorenari.
• 2011ko azaroa: «festetako auziarekin jarraituz, Auzitegi Nazionalak beste hiru herritar deitu ditu lekuko gisa».
• 2011ko azaroa: «bi gazte Auzitegi Nazionalak eskatuta Iruñeko epaitegira deituak, ‘terrorismoa goratzea’ egotzita».
Hauen helburua «hirukoitza» dela uste du babes taldeak: «herriaren izaera deuseztatzea, bereziki gazteria kolpatuz, presoenganako elkartasuna kriminalizatzea eta Euskal Herrian aldatzen ari den egoera politikoan eragitea, urratsak galaraziz». Baina ez dutela lortuko esan du. Eta Espainia eta tokiko gobernuei «errepresioaren bidea alde batera utzi eta elkarrizketaren bideari ekiteko» exijitu die eta hamabi herritarrei «elkartasuna eta babesa» adierazi. Egun hauetan mobilizazioak egitekoak ziren.
Pestetako auzia
Espainiako Auzitegi Nazionalak artxibatu egin du alkatearen, Juantorenaren eta Iraolaren aurka irekitako auzia. Hilaren 1ean jakinarazi zuen, ez dela frogatu txupinazo egunean «terrorismoa goratu» zutenik.