Azaroaren 12an, azken urteetan data horren inguruan egin izan den bezala, San Martin eguna ospatu zen. Duela urte asko San Martinak baziren ere herriko festa nagusiak, eguraldi hotzek ohore hori Santiagori ematea ekarri zuten nonbait. Aurten, ordea, batek baino gehiagok pentsatuko zuen berriz aldaketa egitea, izan ere, San Martinek udako gaugiroa eskaini zigun antolatua zegoenaz gozatzeko, Santiagok ez bezala.
Larunbatean programatua zegoen ganbarako erakusketan jendea ibili zen eta igande eguerdian ere irekita izan zen. Iñigo Olaziregik utzitako erakusketa izan zen, dotore prestatua, eta Euskal Herriko ugaztunen aztarnak beren azalpenekin 40 eta gehiago paneletan ordenatuak zituela. Kontsejun jarritako erakusketaren inguruko galderei zuzen erantzuteak bere saria zuen eta, asmatzaileen artean zozketa egin ondoren, lau lagunentzat otordua Mairtzeneara joan zen.
San Martinetan herritarrek beti eskaintzen dute zerbait eta aurten sendabelarren inguruko tertulia eta ukendu tailerra egin zituzten. Jende asko bildu zen Kontxik eta Maria Jesusek prestatutakoa ikustera eta norberaren ezagutzak konpartitzera. Patas deitutako ukendua eta enplasto bat egiten erakutsi zuten eta aloeberarekin egindako jarabe bat ere eraman zuen bertaratutako batek. Bukaeran, ukendua, enplastoa eta jarabea gerturatutakoen artean banatu ziren.
Egunari bukaera emateko, talo eta gaztaina erreak izan ziren denentzat, Bordaxar eta Ezkerran Bordako sagardoaz lagunduak.
Egun hau aurrera eramateko laguntza eman zuten guztiei berriz ere eskerrak eman behar dizkiegu, Udaletik hasi eta gaztainak erretzeko zotzak biltzen aritu zirenetaraino.