Bi urteko zaharberritze lanen ondotik, azaroaren 5ean egin zen Madalena baselizaren inaugurazioa. Goizean Umore Ona Abesbatzak aurorak abestu zituen, eta ondotik etorri zen baselizako ekitaldia. Inaugurazioa ospakizun hunkigarria atera zen eta jendea pozik gelditu zen. Parrokiako apaiza, Goizuetako seme diren bi apaizak, Leitzakoak eta Goizueta inguruko Gipuzkoako apaiz batzuk lagundu zioten Mikel Gartziandia bikarioari, meza ematen eta aldare berria konsagratzen. Baselizako solairupean dauden hilobien bedeinkapenarekin hasi zen elizkizuna, eta difuntuen hausterreak sartu ziren.
Bi urtez obratan
Obrak 2009ko udazkenean hasi ziren eta tarte horretan, egurrezko teilatupea berritu da. Intsektuak akabatzeko tratamendua ere eman da eta erretaula eta bere irudiak moldatzu dira. Aldarea, eserlekuak eta ateak berriak dira. Horrez gain, XVI. mendeko ateen dintel molduratuak, leihoak eta paretak moldatu dira eta lurzoruko lauzen azpian, hausterreak ehortzeko nitxo berriak egin dira. Atariko galtzadako harriak ere agertu dira eta burdinezko hesiaz itxi da plaza. Iparraldeko paretan tximistorratza jarri da.