Sarriopapel lantegian aurkezteko maiatzean martxan jarritako emakumeen curriculum bilketaren balorazio posibioa egin dute Bilgune Feministak eta LAB sindikatuak. Azaldu dutenez, bilketak «argi erakutsi digu herriko emakumeok herrian egin nahi dugula lan». 50 curriculum inguru jaso eta ondotik zuzendaritzari entregatu zitzaizkien.
«Urteetako aldarrikapen eta lanak izan du emaitzarik», Bilgune Feminista eta LABen iritziz. Izan ere, 20 izan dira udan Sarrion egindako kontratuak eta hauetatik zazpi emakumeenak izan dira: «oso balorazio positiboa egiten dugu, herrian urteetan emakumeak diskriminatu dituen lantegian emakumeak kontratatu dituztelako». Halere, hutsuneak badaudela diote: kontratu erreleboetan, zehazki: «orain arte zazpi egin dira eta hauetatik bi soilik izan dira emakumeonak. Espero dugu urtea amaitzerako gehiagori egitea».
Bitartean lanean segituko dutela adierazi dute: «leitzar guztiek eskubide eta aukera berdinak lortu arte: kalean zein lantegian». Azken honetan, langile batzordeak eskaera bat egin berri dio zuzendaritzari martxoaren 22ko 3/2007 Lege Organikoaren arabera, 250 langileetatik gorako enpresetan, zehaztuta dagoen bezala, Berdintasun Plan bat egiteko eta honen jarriapenerako berdintasun batzorde bat sortzeko baliabideak jarri ditzan. Berdintasun Plana martxan jartzeko bitartekoak sortzea eskatu zaio, prozesu honetan langileen ordezkaritza egotea, Berdintasun Planaren aplikazioa lan hitzarmenean txertatzea eta kontratazioetarako irizpide gisa Europako Batasunean zehaztuta dagoen %60-40ko portzentajea erabiltzea.