Ez da uso denboraldi hasiera ona izan eta ehiztariak ez daude sobera konforme. Mendian omen dabiltza, baina ez omen dute deus ere ikusi. Horrela adierazi zigun Joseba Aierdi Ehiztarien Elkarteko lehendakariordeak denboraldi hasieran. Joan den urteko sasoia ere ez zen sobera ona izan ehiztarientzat, eta Aierdiren irudiko, «aurtengoa bide beretik hasi da, txarragoa ez bada...». Urtetik urtera «gero eta uso gutxiago» pasatzen direlakoan dago lehendakariordea, eta horren ondorioz, «jendea aspertzen ari dela» uste du.
Beharbada horrek ere izanen du zerikusia bazkideen bajaren gorakadan. Izan ere, urteetan bazkideen alta gehiago izan dira, baina iaz baja gehiago izan ziren eta aurten ere berdina gertatu da. Aurten guztira, hamalau baja izan dira eta hiru alta.
Uso, basurde zein oilagorretan ibiltzen diren 400 bat ehiztarik osatzen dute gaur egun elkartea, eta horietatik 337 dira usoetan ibiltzen direnak. Joan den hilabete hondarrean egindako zozketarekin erabaki zen bakoitzak zein postu izanen duen denboraldi honetan.
Junta berritua
Joan den maiatzean berritu zen Ehiztarien Elkarteko Zuzendaritza Batzordea. Aurretik karguetarako boluntarioak aurkezteko deialdia egin zen, baina inor aurkeztu ez zela ikusita, elkarrekin hitz eginez zortzi laguneko taldea osatu zuten orain zuzendaritzan daudenek. Horrela, hauek dira batzordeko kideak: Jose Migel Largo Arraras lehendakaria da, Joseba Aierdi Barriola lehendakariordea, Fermin Lizarraga Larraz idazkaria, Dionisio Lazkano Villanueva diruzaina eta bokalak Rafa Alkaraz Astigarraga, Juan Lara Genba, Jose Mª Alduntzin Perurena eta Agustin Aranburu Villanueva.