Proiektu berritzaile bat darabil Udalak esku artean: igerilekuko ura eguzki plaken bidez berotzeko sistema bat jarri nahi du, hartara, tenperatura aldetik, ura ahalik eta gehien berotzeko. Erabiltzaileei «zerbitzu egokiagoa» eskaini nahi zaie horrela, eta bide batez, «energia garbiak baliatu proiektu berezituak egiteko». Halaxe baieztatu digu Oier Eizmendi alkateak.
Sei eguzki plaka paratuko dira oraingo depuradoraren txabola gainean eta 18.941,05 euroko aurrekontua izanen dute lanek. Halere, Nafarroako Gobernuak %30eko dirulaguntza emanen du hori egiteko.
Lanak dagoeneko hasiak ez badira, laster hasiko dira. Izan ere, azaroaren 31rako bukatuak egon beharko dute. Aipatu, Serviterm enpresak eginen dituela lanak. Zerbitzu berriarekin uraren goxotasuna nolakoa den, berriz, hurrengo urteko denboraldian ikusiko dute erabiltzaileek.