Markak hobetu ez ezik, erraustu ere egin dituztela esan daiteke. Izan ere, aurreko edizioetako errekorrak (Astigarragan 311 kizki eta Oiartzunen 354) aisa gainditu zituzten goizuetarrek urriaren 1ean egin zen hirugarren Kizki Egunean. 503 kizki sartu ziren horretarako prestatutako eremuan, baina heldu den urtean Hernanin eginen den laugarren ediziorako erronka handi xamarra izanen zelakoan, 400 kizkitan jarri dute marka «ofiziala».
Goizetik jendetza handia bildu zen herrian, eguraldi bikaina lagun. Aurreko egunetan guztira 400 kizki saldu ziren baina horrez gain, norberak bere etxetik eramandako kizkiekin ere plazaratu ziren adin guztietako herritarrak.
Kontaketa egin ondotik, marka berria ospatzeko sagardoa txotxetik edan zen eta gero, herri bazkari jendetsua izan zen. Arratsaldean, sagardogintzarekin zerikusia zuen herri kirol desafioa jokatu zen eta horretan Astigarragak duen ofizioa nabarmen gelditu zen, Astigarragako taldea nagusitu baitzen. Ondotik sailkatu ziren Oiartzun eta Goizuetako bi taldeak.
Trikitilariek herriko kaleetan egindako kalejirarekin bukatu zen Kizki Egunerako iragarritako ekitaldiak, ez, ordea, parranda.