Jasotako babesa eskertu dute Saioa Iraola, Lurdes Juantorena eta Oier Eizmendik

Pestetako txupinazoaren harira, Espainiako Auzitegi Nazionalak deklaratzera deitu zituen Oier Eizmendi alkatea eta Saioa Iraola eta Lurdes Juantorena he­rritarrak, «te­rrorismoari gorazarre» egitea egotzita. Irailaren 8an hartu zioten deklarazioa Madrilen eta orain­ epaiaren zain daude.

Hiru herritarrek jasota­ko babesa eskertu nahi izan dute: «ikaragarria, zoragarria eta ezinbestekoa izan da: hiruak, burua tente, irribarre txikia ahoan eta bihotza lasai Audientzia Nazionalera joateko». Baina aldi berean, gertatutakoa salatu dute: «pesten hasierako ekitaldiak zoragarri joan baziren ere, hurrengo egunean komunikabideetan ezjakintasunetik kontatutako kronika irakurtzeko aukera izan genuen. Kronika hau Yolanda Barcinak eta Diario de Nava­rrak elkarrekin pres­ta­tu­tako Leitzaren eta he­rri­tarren kontrako eraso be­rri bat izan zen, gertatu­ta­­koa itxuraldatu eta euren interesen arabera erabil­tzeko», diote hiru lagunek prentsara bidalitako ida­tzian. Komunika­bi­­dee­tatik be­rriak jaso eta hortik hiru egunetarako jaso omen zituzten zitazioak eta hori «onartezina» dela diote. «Honek argi erakusten du komunikabide gehienak indar politikoen menpe daudela». Bide batez, «de­kla­ratu au­rretik eta ondoren jasandako intoxi­ka­zio mediatikoa» salatu dute.

Oier Eizmendi alkateak TTIPI-TTAPAri adierazi dionez, «gertatu den guz­tia nahiko asperga­rria eta nekagarria izan da, festetako egunak ere nekagarriak izan ziren, zure izena eta aurpegia egunero prentsan ikustea ez da erraza izaten, gauza berdinak behin eta berriz azaltzea ere nekagarria izaten da, baina zorionez horrelako gauzekin ez naiz asko urduri­tzen­ eta kontua nahiko la­sai eramatea lortu dut». Momentu «gogorrak eta zailak» izan direla aitortu digu, eta orain epailearen erabakiaren zain dauden honetan, berri gehiago izan arte ez bueltarik ematea erabaki omen du: «alferrik baita zure buruan kontu berari bueltaka aritzea erabakia zure esku ez dagoenean».

Eizmendik argi du «dena munta­tu duten zirku mediatikoa­ren ondorio izan dela». Gai­neratu digunez, «Bil­duk lortutako emaitzak batzuentzat benetan min­garriak izan dira eta nondik edo handik Bilduren aurka egiteko beharra daukate, eta oso garbi geratu da gure aurka egiteko egunkarietan atera ziren itxuraldatutako berriak izan dituztela oin­arri. Helburu politiko batzuekin idatzitako be­rriak izan ziren txupinazoaren ondorengo egunean azaleratu zituztenak eta epaiketak ere bide beretik jarraitu du».

Ho­rrekin batera zera esan digu: «ez nuke aipatu gabe utzi nahi he­rri honen iza­tea apurtzeko batzuek­ daukaten grina, eta pre­soenganako he­rri honek duen elkartasuna delitu dela jendartean sinistarazteko gogoa. Baina jakin dezatela ez dutela lortuko».