Pestetako egitarauan euskal presoen eskubideen aldeko manifestazioa iragartzeagatik Espainiako Auzitegi Nazionalak Oier Eizmendi alkatea inputatu du eta berekin batera, Saioa Iraola eta Lurdes Juantorena ere bai, txupinazoan Jone Lozano presoaren argazkidun kamiseta janzteagatik «terrorismoa goratzea» leporatuta.
Joan den ostegunean, irailak 8, deklaratzekoak ziren hiru inpuntatuak Madrilen, baina bitartean herritarren babesa etengabea izan da: Udalak herriaren eta hiru auzipetuen aurka eragindako kanpaina mediatiko-politikoa salatu zuen irailaren 6an egindako ez-ohiko batzarrean. Auzipetuei elkartasuna adierazteaz gain, erabateko babesa ematea erabaki zuen eta ondorioz, bere gain hartuko ditu bai babes juridiko-teknikoa, bai kostu ekonomikoa nahiz bestelako gastuak.
Horrez gain, hainbat arlotako eragile ugari bildu ziren plazan, auzipetuei babesa ematera eta «pesta bezperan egin ziren presoen aldeko elkartasunaren agerraldiak kriminalizatuz batera, herriaren irudia osotara manipulatua ematen ari direlako». Eragileen arabera, «hemen egon ez eta, egun horretan plazan eta udaletxean gertatu zenaren bertsio osotara nahastu, gezurrezko eta interesatuak hedatu dituzte; hemen sekulako guda batean bizi bagina bezala; elkarbizitza ezinezkoa izanen balitz bezala».
Eragile hauen esanetan, «inoiz izan badira, aurtengo pestak izan dira lasaiak, inolako liskarrik gabekoak eta jendea patxadaz ibili dena». Eragileek bere babes osoa eta laguntza eskaini nahi izan zieten «asmatutako auzi honetan gertatzen ari zaien injustizia honen aurrean».
Hilaren 8an, berriz, deklaratzeko egunean, bi orduko lanuztea eta elkarretaratzeak egin ziren.
Inpuntatuei babesa agertu dietenen artean daude: Aurrera Elkartea, IKA, Kornieta Elkartea, AAM, ALKE, Marmari, Mendigorria elkartea, Saharar Herriaren aldeko elkartasun taldea, Torrea elkartea, Jeiki abesbatza, Liñoputzu ehoziri elkartea, Gazte Asanblada, Gazte independentistak, Muttur bero elkartea, Karrape Irratia, Atekabeltz elkartea, Bilgune Feminista, EHNE, Erraldoien konpartsa, txalapartariak, LAB, dantzariak, pilota eskola, kirol-joko taldea, Mendibil mendi-taldea, Aurrera futbol-taldea, Perra zaldi-taldea eta norbanako ezagunok: Iñaki Perurena, Oinatz Bengoetxea, Jose Luis Huarte, Jon Kanflanka, Ibai Bengoetxea, Iñaki Agirre, Abel Barriola, Maite Perurena, Aimar Sagastibeltza, Patziku Perurena, Ruben Astibia, Iera Agirre, Asier Olaizola, Mikel Ilarregi, Joxton Olaetxea, Aitor Zabaleta, Iker Alduntzin, Josu Erbiti, Zuriñe Odriozola, Maria Jesus Ariztimuño, Junkal Otxotorena eta Teresa Martinez.