Sagarrak eta kizkia tartean direla, Kizki Eguna eginen da urriaren 1ean Goizuetan. Sagarraren eta sagardoaren kultura bultzatzeko helburuarekin antolatu da eta egun berezia izanen da, jende asko elkartuko duena. Izan ere, sagarrak eta sagardoak euskal gizartearekin lotura haundia izan dute betidanik eta hori ezagutarazteko hasi ziren orain dela bi urte Astigarragan Kizki Eguna antolatzen. Horren barne, marka ere ezarri zuten, kizkiarekin sagarrak biltzen 311 lagun elkartuz. Joan den urtean, Oiartzunek hobetu zuen marka, 355 lagunekin, eta aurten Goizueta saiatuko da gainditzen, jaso den desafioari baietz erantzun baitio.
Eguerdian hasiko da jendea biltzen. Bakoitzak bere kizkia izanen du eskuan, sagarrak lurrean egonen dira eta epaileak agindua emandakoan, kizkiekin sagarra bildu eta saskira. Marka hobetzeko 355 lagun baino gehiago behar dira.
2015era bitarte hainbat herritan eguna ospatzea da asmoa, eta urte horretan, Astigarragan berriz Kizki Eguna antolatu nahi da eta 1.000-1.500 lagun sagarrak biltzeko elkartu.
Marka hori izanen da urriaren 1eko ekitaldi nagusia, baina ez bakarra. Eguerdian herri bazkaria eginen da eta arratsaldean desafioa, festa hau egin den herrien artean: Goizueta, Astigarraga eta Oiartzun nor baino nor ariko dira. Hasteko, talde bakoitzak lau zaku sagarrez bete beharko ditu, 40 kilo sagar; gero leran jarri eta plazak egin beharko dituzte; segidan matxakara bota eta txikitu eta handik ateratzen den patxa tolarera bota.
Ilunabarretik aurrera ere ez da festarako aitzakiarik faltako.
Aipatzekoa da, orain arte festa honen antolaketaren ardura elkarte edo erakunde batek hartu izan duela, baina Goizuetaren kasuan herriko eragile guztiak ari dira lanean.
Kizkiak salgai
Kizkiak herriko talde batek eginen ditu eta eguna baino lehen salgai jarriko dira. Horrekin batera, izena ere eman beharko da, antolatzaileek jakin dezaten gutxi gorabehera zenbat lagun etorriko den. Edozein kasutan, 355 laguneko muga gainditzeko zalantza haundirik ez dago herrian, «Goizuetan burugogorrak gara eta desafioari baietz esan diogu. Bertako jendearekin bakarrik ez, baina kanpotik etorriko denarekin hobetuko dugu marka». Halaxe adierazi digu Fernando Goiak.
MARKA HOBETZEKO ASMOA
«Goizuetan burugogorrak gara eta desafioari baietz esan diogu. Bertako jendearekin bakarrik ez, baina kanpotik etorriko denarekin marka hobetuko dugu»
Fernando GOIA