Uztailaren 10ean Nafarroako Triatloi laburreko txapelketa irabazi zuen Judit Saizar leitzarrak Tuteran eta abuztuaren 7an, distantzia olinpikoan ere Nafarroako Triatloi txapelketa irabazi du Iruñean, Club Natacion Pamplona taldeak antolatutako proban. 17 urterekin oraindik junior kategoriako kirolaria bada ere, Saizarrek txapelketa absolutoa irabazi zuen emakumezkoen artean.
Arga ibaian kilometro terdi igerian, Iruñerrian 40 kilometro bizikletan eta Argaren ibai parkean barna 10 kilometro lasterka egiteko bi ordu, 20 minutu eta 11 segundu behar izan zituen Lagunak-Saltoki taldeko Leitzako kirolariak. Bigarren, AC Triatlon taldeko Ana Casares beteranoa izan zen eta Saizarrek baino minutu bat eta 12 segundu gehiago behar izan zituen. Club Natacion Pamplonako Ana Monrealek osatu zuen podiuma.