Urtero bezala, herri kirolean Nafarroako hainbat txapel erabaki dira Iruñeko Sanferminetan. Uztailaren 10ean Nafarroako bikotekako aizkolari txapelketa jokatu zen eta Nazabal eta Rekondo leitzarra gailendu ziren, Larretxea aita semeak eta Lopez-Senosiainen aurretik. 60 ontzako sei kanaerdiko ebaki behar zituen bikote bakoitzak eta azkeneko bi enborretan Rekondo eta Nazabalek aurre hartu zuten, garaipena eskuratuz. Bigarren postua lortu zuten Lopez-Senoiain bikoteak eta hirugarren egin zuten Larretxea aita semeak izan ziren.
Egun berean, Nafarroako gurdi altxatze txapelketan Josetxo Urrutiak irabazi zuen. Hiru itzuli eman zuen 170 kiloko karroarekin. Lazaro Bujanek ere parte hartu zuen. Aipatzekoa da harrijasotze txapelketan ere azpitxapeldun izan zela Urrutia.
Gizonezkoen txinga erute txapelketan bi leitzar izan ziren aurrez aurre uztailaren 12an, Miguel Angel Sukuntza eta Patxi Baraibar. Ahalik eta plaza gehien egiten behar zituzten esku banatan 50 kiloko txingak hartuta. Sukuntzak 17 plaza 1/4 eta 4,80 metro egin zituen. Baraibarrek aldiz 10 plaza gutxiago egin zituen, guztira zazpi plaza 1/4 6,10 metro osatuz.
Jon Kanflanka azpitxapeldun
Euskadiko Sega Txapelketako finala jokatu zen Oiartzungo Pikoketan uztailaren 10ean. 2009an bezala, Lizaso asteasuarrak jantzi zuen txapela, 5.451 kilorekin. Iaz bezala txapeldunorde geratu zen Jon Kanflanka segalari leitzarra 306 kiloko gutxiago ebaki zituen. Mikel Alkorta izan zen hirugarren eta Arkaitz Arteaga laugarren.