Atekabeltz Gaztetxeak sei urte betetzen ditu aurten. Hori dela eta uztailaren 18tik uztailaren 22ra egunero ekintzak antolatu dituzte. Urteurren astearei ekiteko uztailaren 18an, astelehena, 20:00etan “Herrialde arabiarretako azken iraultzak kontagai” hitzaldia izanen dute.
Uztailaren 19rako, asteartea, mendi martxa antolatu dute. Goizeko 10:00etan irtengo dira Leitzatik eta gaupasa alternatiboa eginen dute Sasainen.
Uztailaren 20an, asteazkena, 20:00etan parrillada eginen dute. Uztailaren 21ean, osteguna “Sagarren denbora” dokumentalaren proiekzioa izanen da. Astea bukatzeko uztailaren 22an , ostirala, II. laburmetrai txapelketara aurkeztutako lanen proiekzioa eginen dute.
Egun handia uztailaren 23a, larunbata, izango da. Egun osoko ospakizuna antolatu dituzte Atekabeltzeko lagunek. 11:00etan bizikleta gaineko diana izango da herrian barrena. Ondotik II. Binakako frontenis txapelketako finala jokatuko dute finalistek plazako frontoian.
13:30ean sei urteak merezi duten brindisa egingo dute eta 14:00etan ekingo diote bazkariari. Arratsaldean poteoa egingo da Leitzako tabernetan karro musikatuaren laguntzaz eta gauean, 23:00etatik aurrera ‘Soñadores natos’ taldeak kontzertua eskainiko du.