Berriz ere Leitza eta Goizueta aurrez aurre jarri ditu pilotak. Aldi honetan Aimar Olaizola eta Oinatz Bengoetxea izanen dira protagonistak, igande honetan, maiatak 29, Donostiako Atano III.a pilotalekuan jokatuko den lehian. Eskuz Banakako Txapelketako finalerdia izanen da. Neurketa honetan erabakiko da dagoeneko finalerako txartela eskuratua duen Xalaren aurkaria zein izanen den final haundian.
Pilota aukeraketa
Ortzegunean, maiatzak 26, egin zituzten bi pilotariek pilota aukeraketak. Goizuetarrak 105,8 eta 105,2 gramoko pilotak aukeratu ditu eta leitzarrak 106,1 eta 104,5koak. Aukeraketaren ondotik, “horrelako materialik aspaldi ez zuela izan” adierazi zuen Bengoetxea VI.ak: “frontisetik guttiago ateratzen dira, lurrean ibiltzen dira eta efektu gehiago hartzen ditu. Besteak baino bote gutxiago egiten du. Larruazal gogorragoa du. Nire pilotak dira, betidanik gustatu izan zaizkidanak".
Goizuetarrak, bere aldetik, “pilota politak” zirela esan zuen leitzarrak bereizitakoei buruz, baina "horrelako pilotak binakako partidetan ere jartzen direla”. Bere piloten inguruan, “gehiago ateratzen direla eta ez direla motelak” argitu zuen. “Ez nuke esanen, bereak nireak baino biziagoak direnik”, gaineratu zuen.