Azken urteetako hitzorduari hutsik egin gabe, Leitzako Erleta, Goizuetako Xalto eta Aresoko Nazabal eskolen eta Leitzaldeko lau herrietako haur eta gurasoen topaketa eginen da aurten ere. Larunbat honetan, maiatzak 14, izanen da, eta aldi honetan, Leitzak hartuko du lekukoa, joan den urtean Goizuetan eta duela bi urte Areson egin zelako topaketa. Erleta eskolan pasako dute eguna.
Hiru eskolekin eta Guraso Elkarteekin batera, Arano, Areso, Goizueta eta Leitzako Gizarte Zerbitzuen Mankomunitatea hasi zen egun hau antolatzen duela hamabi urte, eta oraindik ere hasierako helburu berdinei eusten diete: Arano, Areso, Goizueta eta Leitzako haurrak, gurasoak eta irakasleak jaigiroan elkartzea; aisialdirako alternatiba osasungarriak eskaintzea; herri bakoitzeko ohiturak eta berezitasunak ezagutzea eta elkarlana eta elkartasuna bultzatzea, ikasleek eta taldeek egindako ekintzak gurasoei eta herritarrei erakutsi bidenabar.
3 eta 12 urte bitartean dituzten neska-mutikoei eta beraien senideei eta irakasleei dago zuzendua topaketa hau.
Egitaraua
• 11:00etan eskulan tailerrak.
• 12:30ean jolasak adinaren arabera, hiru multzotan banatuta: Haur Hezkuntzakoentzat jausgailu edo parakaidasa, soka saltoa, txorro morro, karabin karaban... Lehen Hezkuntzako 1., 2. eta 3. mailakoak koxkor biltzen, zakoekin, tokan edota globoak lehertzen ariko dira. Eta Lehen Hezkuntzako 4., 5. eta 6. mailakoentzat altxorraren bila jolasean.
• 14:00etan bazkaria.
• 16:30ean diaporama.
• 16:45ean eskoletan prestatutako bertsoak eta abestiak kantatuko dituzte.
• 17:30ean: merendua.
• 18:00etan: dantzak.
• 18:15etik 18:30era ospakizunaren bukaera.