Goizuetako festen artean gero eta sona haundiagoa hartzen ari diren Txino auzoko Jaiak maiatzaren 6an eta 7an ospatuko dira. Beti bezala, egitarau ederra osatu du Gazte Asanbladak, Udalaren, Umore Ona Elkartearen eta Zubi-Ondo eta Gordea tabernen laguntzarekin.
Ostiralean, maiatzak 6, 20:00etan bertso musikatuak izanen dira Zubi-Ondo tabernan, Unai Gaztelumendi eta Julen Zelaieta bertsolariekin eta Dani Narbarte trikitilariarekin. Eta 21:00etan mus txapelketan eginen da Zubi-Ondon.
Egunik haundiena, halare, larunbatekoa izanen da, maiatzaren 7koa. 11:00etan txupinazoa edo itxaferoa botako da eta ondoren buruhaundiak eta trikitilariak kalean ibiliko dira. 11:45ean Umore Ona Dantza Taldeak bere saioa eskainiko du eta 12:30ean asto lasterketa eginen da: Txino auzoa eta herriaren arteko lehia izanen da.
14:30ean bazkaria izanen da eta joan nahi duenak Amaia kafetegian erosi beharko ditu txartelak. 18:00etan Bide Batez berbena taldearekin dantzaldia izanen da eta gauean kontzertuak Garajean. Besteak beste, Bad Sound System taldeak joko du.