Aizkolari gazteak lanean paratzeko asmoz Gabriel eta Mieltxo Saralegik antolatutako Adania Aizkolari Saria arrakasta haundiarekin joan da. Lekunberrin eta Donezteben jokatutako finalerdien ondotik, finala martxoaren 20an jokatu zen Leitzan eta 350 lagun inguru bildu ziren Amazabal frontoian.
Hiru kategoriatan jokatu ziren lehiak: 23 urtez azpiko proba nagusian Oihan Larretxea beratarra nagusitu zen: 13 minutu eta 8 segundo behar izan zituen lanak amaitzeko. Bigarren Ugaitz Mugertza II.a gelditu zen, 13 minutu eta 34 segundoko lana eginda; hirugarren Ruben Saralegi leitzarra sailkatu zen (15:15) eta laugarren Aratz Mugertza III.a (15:55).
18 urtez azpikoetan, berriz, Eloi Kortxero eta Unai Otaño aritu ziren. Kortxerok 8 minutu eta 6 segundotan bukatu zituen lanak eta Otañok, berriz, 32 segundo gehiago behar izan zituen.
14 urtez azpikoetan, etxean gelditu zen txapela. Mikel Zabaleta leitzarrak irabazi zuen, 6 minutu eta 6 segundoko denbora eginez. 50 segundo atera zizkion bigarren sailkatu zen Iker Vicenteri. Hirugarren Julen Larrea gelditu zen (08:38).