Joan den ostegunean, martxoaren 17an, Leitzako futbol eskolakoek bisita atsegina jaso zuten, Osasuna futbol taldeko Asier Riesgo atezain debatarra eta Lizarrako Oier Sanjurjo jokalaria joan baitziren. Leitzako Herriko Etxean harrera egin zieten eta jokalariekin batera, Osasuna Fundazioko Juan Pascual eta Diego Makirriain, Lacturale enpresako Maite Azpiroz, Leitzako alkate Xabier Zabalo eta Leitzako futbol eskolako Unai eta Xabier Sagastibeltza entrenatzaileak izan ziren.
Eguna, Osasuna Fundazioaren eta Leitzako Udalaren arteko hitzarmenaren sinadura ekitaldiarekin hasi zen. Gero, futbol eskolako ikasleek hainbat galdera egin zizkieten Sanjurjo eta Riesgori eta hauek erantzuteaz gain, autografoak sinatu zituzten beraien irrifar onenarekin.