Bide onetik doaz Landa Goikoan egiten ari diren etxebizitzen lanak, eta Xabier Zabalo alkateak TTIPI-TTAPAri adierazi dionez, «urte bukaeran etxebizitzak jabearen esku egongo direla kalkulatzen da». 2010eko martxoan hasi ziren obrarekin Uzti eta Muroa enpresak. Lehenengoa Landa Goikoan eraikitzekoak diren 40 etxebizitza horietatik 32 egiten ari da eta Muroak du gainerako zortzien ardura.
Ia denak herritarrentzat Etxebizitza horiek eskuratzeko 200 bat eskaera jaso zituen Udalak, gehienak herritarrenak. Eta esleitu ere hala egin dira, 40 etxebizitzetatik 39 leitzarrentzat izanen baitira, eta bestea eskualdeko batentzat. Horrela kontatu digu Zabalok.
Landa Behekoak eta etxebizitza hutsak erantzunaren zain
Landa Behekoan egin nahi diren 216 etxebizitzen egitasmoarekin aurrera egin ahal izateko, Nafarroako Gobernuko Etxebizitza Sailaren azken onarpenaren esperoan dago Udala. Alkateak esan digunez, «hau bukatzean honi buruzko behin betiko ordenazioari buruz hitz egin beharko da».
Bestalde, etxebizitza hutsen gaian ere Gobernuaren erantzunaren zain dago Udala. Herriko Etxetik eskainitako gestio-hitzarmenari oraindik ez baitio erantzun. Udalak errentan emateko tramiteak berak eginen dituela eta Gobernuak kontratu hauek babestu eta gestioak diruz laguntzeko proposatua dio Gobernuari.
Etxebizitza hutsak errentan ematea da Udalaren asmoa. Horretarako onartu zuen etxebizitza hutsen ordenantza eta ondotik, hutsik dauden 86 etxebizitza zenbatu zituen. 25 herritar agertu ziren interesatuak. Baina oraindik ez diete ezer esan Gobernutik, nahiz eta alkateak azaldu digunez, «behin eta berriz saiatu».