Afizionatuetatik profesionaletarako saltoa eginez, hiru urterako kontratua sinatu du Jon Jaunarena pilotariak (Leitza, 1992) Aspe enpresarekin. Abenduaren 29an debutatu zuen Tolosako Beotibar pilotalekuan, Barriola atzean zuela. 22-14ko emaitzarekin galdu egin zuten bi leitzarrek, baina itxura ona eman zuen gazteak eta eskuin golpe izugarria duela erakutsi zuen. Orain, berriz, Binakako Bigarren Mailako Txapelketa jokatzen ari da Larrinagarekin batera.
HOBETU BEHARRAK
«Gauza guztietan hobetu behar dut: errematean tantoak bukatzen, defentsan... Gaztea naizen aitzakia horrekin espero dut hobetzeko denbora izatea».
AMETSAK
«Profesionaletan debutatzea zen aurreneko ametsa. Eta orain ahal bada txapelketak irabazi nahiko nituzke. Ilusio haundiena buruz buruko txapela janzteak eginen lidake».
Antonio aitaren bidea aukeratu izan balu, aizkolaria izanen litzateke orain Jon Jaunarena. Eta probatua du aizkora, baita gustatu ere, baina ez pilota bezainbeste. Aizkoran nola moldatuko litzatekeen ezin jakin, beraz, baina pilotan behintzat ederki egiten da. Baditu dohainak eta horregatik nabarmendu da txikitatik pilotan. Emaitza bikainak lortu izan ditu afizionatuetan, garaipen eta txapel asko eta orain koxka bat gorago igo da, afizionatuetatik profesionaletarako urratsa emanez. Bazekien Aspek ongi, maila oneko pilotaria izan daitekeela, eta horregatik sinatu zuten Jaunarenak 16 urte zituela Asperekin entrenatzeko aurrekontratua. Orain, 18 urterekin, hiru urterako kontratua sinatu du.
Jaunarenarekin Goizuetarena berdindu du Leitzak. Alegia, Barriola eta Bengoetxea VI.aren ondotik, gaur egun profesionaletan ari den hirugarren leitzarra da Jaunarena. «Herrian pilotarako afizio haundia dago eta hiru pilotari izatea pozgarria dela uste dut», dio. Abenduaren 29an Tolosako Beotibar pilotalekuan debutatu zuen leitzarrak, Barriola lagun.
Aritz Lasa eta Laskurainen kontra galdu zuten, baina profesionaletako debuta zaila izaten da beti. «Urduritasuna» nabaritu omen zuen: «partida oso gogorra izan zen, kontrarioak ere bagenekien oso gogorrak izanen zirela. Abelek asko lagundu zidan eta ni ahal nuena egiten saiatu nintzen. Baina aurreneko partida zen eta nahiko nerbioso aritu nintzen. Halere, itxura txarra behintzat ez nuela eman uste dut». Argi gelditu zena, hori bai, bere golpea izan zen. Hala diote adituek, eta berak ere hala aitortu digu: «gehienbat eskuin golpea».
Gaztea da oraindik, martxoan beteko ditu 19 urte, baina gogotik saiatu nahi du. Adinak ematen dion aukera baliatu nahi baitu hobetu beharrekoak hobetzeko: «gauza guztietan hobetu behar dut: errematean tantoak bukatzen, defentsan... Gaztea naizen aitzakia horrekin espero dut denbora izatea».
Aurrelaria izanagatik atzean ere moldatuko litzatekeela erran du batek baino gehiagok. Berak, ordea, aurrelari nahiago. «Nik uste bietan moldatzen naizela, baina aurrean jokatzea gehiago gustatzen zait eta horretan segitu nahi dut». Jokoan ere nabaritu du aldea leitzarrak. «Afizionatuetan partida bat edo beste errezagoak izaten ziren, baina profesionaletan partida guztiak oso zailak eta gogorrak dira. Gutxien jokatzen duenak ere asko egiten du», adierazi digu. Bigarren Mailako Binakako Txapelketan ari da orain, Larrinaga atzean duela. «Orain arteko partida gehienak galdu ditugu», dio, eta «zaila» ikusten du sailkapena. «Ahal dena egiten da hemen, ahal den hobekien jokatu eta ahal bada irabazi». Kontatu digunez, «astean bi aldiz Tolosara joaten naiz eta Justo Lillo prestatzailearekin aritzen gara. Frontoian normalean Iruñean entrenatzen dugu». Eta profesionala izanda, gehiago ligatzen ote du orain?: «Baten batek igual bai, baina nik ez. Hori ez da asko aldatu».
Etxekoez ere galdetu diogu: «debutatu aurretik ere oso pozik zeuden eta orain nahiz eta ez oso emaitza onak lortu, espero dut denborarekin emaitzek laguntzea eta denak pozik egonen gara». Bere lehenengo ametsa bete du: «profesionaletan debutatzea». Orain gainerakoei heldu nahi die: «ahal bada txapelketak irabazi. Ilusio haundiena buruz buruko txapela janzteak eginen lidake». Garaiz dabil, eta ea hala den.