Martxoko lehenengo asteburuan ospatuko diren inauterien atarian, aurten lehenengo aldiz, kaldereroen eguna ospatuko da. Martxoaren 5ean, larunbatarekin, eginen da, hau ere herriko kantuzale batzuen eskutik. Horien artean dago Juan Antonio Lekuona eta berak azaldu digunez, «inauteriak hasten diren egunaren bezperan, herrian giroa sortzea da helburua» eta «nahi duen guztiak parte har dezake».
Desfilearen ondotik, afaria eginen da plazan, eta eguraldi txarra eginez gero, pilota plazan. Hori bai, Lekuonak argitu nahi izan digu, «afaria taldeka» eginen dela, alegia, bakoitzak arduratuko beharko duela bereaz.
Kaldereroen kalejira ahalik eta hobekien ateratzeko, urtarrilaren 29az geroztik, larunbatero entseguak egiten ari dira eskolako jangelan, 19:00etan. Entseguak irekiak dira eta oraindik beste lau gelditzen dira.