Mendi bizikleta dute gustuko eta horixe da, hain zuzen, elkartzen dituena Mendibil BTT taldekoak. Mendibil Mendi Taldearen baita sortutakoa da. Zazpi pertsona bildu ziren horretarako: Patxi Astiz, Jon Roda, Hegoi Huarte Katzo, Maxi Benitez Piza, Mikel Landeta, Juan Luis Santano Wui wui eta Joanes Zabaleta Danbolin, baina orain arte egindako ateraldietan jende gehiago ere ibili da mendi bizikleta gainean.
Hasieran, bakoitza bere kabuz edo talde txikiagoetan ibiltzen ziren, baina bakarrik ateratzeko nagi hori kendu, hobeki pasatzeko eta leku gehiago ezagutzeko helburuarekin elkartzea pentsatu zuten. «Normalean inguruko mendietan ibiltzen gara –diote Mendibil BTTkoek–, gehienetan Plazaolako estazion gelditu eta handik abiatzen gara. Baina batzuetan autoan sartzen ditugu bizikletak eta beste leku batera joaten gara: Goizueta, Lesaka, Andoain... Aurreko egunean autoak nonbait utzi eta buelta autoan ere egiten dugu».
Urte osoko egitaraua
Taldetxo hau asteburuero biltzen da eta irteera zail xamarrak ere egiten ditu, baina urte osorako edozeinek egiteko moduko ateraldiak antolatu ditu hilabetero. Hilaren 15ean Leitzalarrera egitekoa zuten, eta otsailean Leitza, Basakabi, Ezkurrako txabola, Idiazabal, Uitzi, Leitza; martxoan Ezkabara; apirilean Elgorriaga, Arantza, Elgorriaga; maiatzean mendi taldekoekin Ulibarrira; ekainean Picos de Urbionera; uztailean Leitza-Urroz; abuztuan Urbasara; irailean Leitza-Adarra; urrian Iratira; azaroan Anbotori buelta eta abenduan Zumaiara. «Eskatzen dugun bakarra bakoitzak bere kaskoa eta pintxazoentzako ordezkoak ekartzea da eta nola ez, umore ona», esan dute.
Agian ateraldiren bat aldatuko dute, baina hau dena segitu edo argazkiak ikusteko sartu Facebooken: btt mendibil leitza eta izenak emateko edo edozein gauza galdetzeko idatzi btt_mendibil@hotmail.com-era.