Bidegorriaren proiektuari segida eman nahi dio Udalak, eta asmo horrekin erabaki du Madaleneko Zubitik Olatxora doan zatia oinezkoentzako egokitzeko proiektuari hasierako onarpena ematea. Kilometro eta erdiko zatia da eta gutxi gorabehera hiru metro zabalerakoa. Garai batean zentral elektrikoarentzako ura eramaten zen kanala da bidegorri bilakatu nahi dena. 71.000 euroko aurrekontua du.
Mieljoxe Lekuona alkatearen hitzetan, «obra hau herriarentzako egokia da. Gainera, Goizuetako errepidea oso estua da eta gero eta jende gehiago ibiltzen da paseoan». 2009an Olaberritik Madaleneko Zubia bitarteko bidea egokitu zen, eta «arrakasta haundia» izaten ari dela adierazi digu Lekuonak. Honi segida emanez, Olatxora artekoa bidegorri eginez, guztira bi kilometro edukiko lituzke oinezkoen bideak.
Hasierako onespena da Udalak eman duena. Beraz, Aldizkari Ofizialean argitaratu eta alegazioen epea zabalduko da gero. Horren arabera, gehiago edo gutxiago luza daiteke tramitazioa. Edozein kasutan, Lekuonak aipatu digunez, «helburua aurten egitea da».
Komunalen erabilera
Komunalak erabiltzeko ordenantza ere onartu du Udalak eta horren arabera, komunalak erabili ahal izateko azienda guztiek saneamendua pasatua izan beharko dute. Eta aldi berean, aziendek herrian baratzeak edo kaleak ukitzen badituzte, ordenantzen bidez onartutako isuna jasoko dute, 30 eurotik 12.000 euro bitartekoa.