Nafarroako Gobernuak bultzatzen duen PIGRN-ek (Nafarroako Hondakinen Plan Integrala) dioenez, errausketa erabiliko da hondakinak deuseztatzeko metodo bezala gure herrialdean. Horren ondorioa, jakina, erraustegi bat eraikitzea izanen da, eta hau ez du begi onez ikusten gure Udalak, sistema honek «osasunerako eta ingurumenerako arriskuak ekarriko dituelako», besteak beste.
Iruñeak ez du erabaki oraindik erraustegiaren kokapena, baina hondakinen plana azaltzeko egindako bileretan argi eta garbi jo du alternatiba horren alde. Zenbait hizlari eta teknikarik aurkeztutako beste hainbat aukera baztertu ditu gainera, atez ateko bilketa, esate baterako. Honen aurrean, proposamen guztiak ikertuko dituen eztabaida «erreal eta serioa» exijitu dio Goizuetak Nafarroako Gobernuari, hainbat udal eta mankomunitatek ere gai honi buruz erabaki ahal izatea aldarrikatzen duten bitartean.
Zumarreneko zabortegia
Mendialdea Mankomunitatea sortu eta herriko eta Aranoko zaborrak kanpora eramaten hasi zirenetik obretako eskonbroak besterik ez dira botatzen Zumarreneko zabortegira. Era horretako zakartegien itxiera eta ondorengo errehabilitazioaren agindua eman zuen Europak aspaldi xamar eta gureari ere ailegatu zaio horretarako txanda.
Dagoeneko sinatuta dagoen akordioaren arabera, 850.000 euroko kostua izanen du Zumarreneko inpermeabilizazio lanak eta aurtengo ekainean ekinen diote lehenengo faseari (510.000 euro). Bigarren fasea, berriz, Toki Azpiegituren Hirurteko Planaren barrenean sartuko da. Edozein kasutan, aipatutako dirutzaren %20 bi herriek ordaindu beharko dute.