18 urte dituen Jon Jaunarena (1992/03/02) leitzarra fitxatu berria du Aspek hiru urterako. Dagoeneko profesionaletako lehen partidarako hitzordua ere finkatu dute: Leitzako aurrelariak abenduaren 29an, asteazkenarekin, debutatuko du Tolosako Beotibar pilotalekuan.
Duela bizpahiru urte bota zion begia Aspek Jaunarenari. Leitzarrak 15 urte zituela, hiru urtez Eibarko enpresarekin entrenatzeko kontratua sinatu zuen. Jabi Perez eta Justo Lillorekin hasi ziren lanean lehenbizi eta entrenamenduak etorri ziren gero. Hiru urteko saioen ondotik, Aspeko pilotaria da orain. Eta aldi berean, momentu honetan profesionaletan ari diren hirugarren pilotari leitzarra izanen da, Barriola (Aspe) eta Bengoetxearekin (Asegarce) batera.
Gaztea izanagatik, palmeres ederra du atzetik Jaunarenak, hainbat txapel eskuratu baititu pilotan daramatzan urteotan, banaka zein bikoteka, eta frontoi osoan zein lau t’erdian.